ბრაზილიის ფედერაციული რესპუბლიკა - სამხრეთ ამერიკის კონტინენტზე ყველაზე დიდი სახელმწიფო. ბრაზილია კონტინენტის ცენტრალურ და აღმოსავლეთ ნაწილებს იკავებს (კონტინენტის 43,3 პროცენტი.

ბრაზილია თითქმის ყველა სამხრეთამერიკულ ქვეყანას ესაზღვრება (ჩილეს და ეკვადორის გარდა). ჩრდილოეთით – საფრანგეთის გვიანა, სურინამი, გაიანა, ვენესუელა; დასავლეთით – კოლუმბია, პერუ, ბოლივია; სამხრეთ-დასავლეთით – პარაგვაი, არგენტინა; სამხრეთით – ურუგვაი. ხოლო ჩრდილო-აღმოსავლეთით, აღმოსავლეთით და სამხრეთ აღმოსავლეთით ბრაზილიას ატლანტიკის ოკეანე ესაზღვრება. ბრაზილიასვე უკუთვნის ატლანტიკის ოკეანეში არსებული ბევრი კუნძულიც (ფერნანდუ დი ნორონია, სან-პაულო, ტრინდადი, როკასი, მარტინ ვასი).

ბრაზილიის სანაპირო ზოლის სიგრძეა 7.4 ათასი კმ. მართალია, სანაპირო ზოლი მკვეთრად გამოხატული არ არის, მაგრამ აქვს ბევრი ყურე და სანაპირო, რომლებიც ბუნებრივი ნავსადგურების მოვალეობას ასრულებენ.